Barangay captain, naglabas ng saloobin hinggil sa birthday pantry ni Angel Locsin



Sa kabila ng kanyang hangarin na makatulong umano, hindi naging maganda ang nangyari sa community pantry na inorganisa para sa pagdiriwang ng kaarawan ni Angel Locsin.


Ito ay matapos ang pagdagsa ng napakaraming tao at ang pagkamatay ng isang senior citizen habang pumupila para makakuha ng ayuda.


Hindi maitago ng punong barangay ng Brgy. Holy Spirit na si Chito Valmocino ang kanyang sama ng loob nang nakapanayam siya ni Cesar Chavez sa DZRH.




Aniya, kulang daw ang koordinasyon ang kampo ng aktres sa kanila, lalo na nung dumami na ang mga tao.


“Magulo at walang malinaw na coordination, kahit na po tinatanong paulit-ulit ng mga tao ko ay ayaw nilang sagutin. Nang dumating si Madam Angel, alas siyete siya dumating. Ang pila po ng tao nang siya ay dumating na at umikot po dun sa may St. Peter ay umaabot na po ng Litex, alas siyete pa lang ng umaga."


Kinuwestiyon nito ang bilang ng tao na naunang nasabi umano sa kanila na 300 lamang daw. Hindi din daw agad humingi ng assistance ang kampo ng aktres matapos makitang dagsa na ang tao.


“Nakita na nila na libu-libo na ang tao, bakit hindi sila nagsabi na, 'Tama na. Tigil na. Tatlong daan lang ang kaya namin.'”


Nabanggit pa nito na bukod sa namatay na senior ay mayroon pa umanong lima pang katao na nahimatay na napag-alaman umano nilang hindi taga Brgy. Holy Spirit.

Powered by Blogger.