Batang nagbigay ng mga kamote sa kanilang community pantry, bibigyan ng scholarship



Kahanga-hanga ang ginawa ng batang si Ornelo "Don Don" Sinagmayon ng Occidental Mindoro na nagbahagi ng kalahating sako ng kamote sa kanilang community pantry.


Kwento ng isa sa mga organizers ng kanilang pantry na si John Christoper Lara ng Kilusang Nagmamalasakit sa Lalawigan, nagulat daw sila nang biglang lumapit ang siyam na taong gulang na batang si Don Don dala ang kalahating sako ng kamote.


Nalaman ng Trending Bytes na 'di lamang isang beses nagbigay si Don Don ng tulong para sa kanilang community pantry.



Ayon sa kanyang ina na si Marialyn, sariling tanim nila ang mga kamote at naghanda talaga sila ng maari nilang naibigay sa kanilang pantry sa Barangay Pinagturilan.


Nang makapanayam nina John Christopher ang mga kapitbahay nina Don Don, sinabi ng mga ito na mabuti at maasahang bata ito lalo na ng kanyang ina. Nagtatrabaho kasi ang kanyang kuya at tatay at si Don Don ang nakakatulong sa kanyang ina sa kanilang bahay.


Dahil sa nakakaantig pusong kabutihan na nagawa ng bata, nagmalasakit ang organisasyon nina John Christopher na bigyan ng grocery items din ang pamilya ni Don Don.



Hindi lamang ito, sisiguraduhin din nilang magiging maayos ang kinabukasan ng bata na bibigyan nila ng full scholarship mula elementarya hanggang sa makapagtapos siya ng kolehiyo.


Mababakas sa larawan ng bata ang kasiyahan lalo na at matutupad ang kanyang maging pangarap na maging isang guro.

Powered by Blogger.